1 . 19歲少男琴日去咗急症室（唔知佢要等幾多萬個鐘），話自己痛風（？做下全身檢查好喔咁後生！）佢成功攞到當日假紙。今日過嚟隊嗰張假紙俾我睇（隊過黎做咩？咁樣唔會比到壓力我！）同我講話佢今日隻腳都痛，今日都想放假。
既然琴日有專業偉大嘅急症室醫生睇過你，都覺得你淨係需要放一日假。你隻腳而家唔紅唔腫唔熱，你健步如飛咁行入黎，咪傻啦！叫佢再食啲勁啲嘅止痛藥，佢話唔使。咁你即係痛定唔痛呢？
一係你就再走去痞急症，再等返幾廿萬個鐘，睇下佢肯唔肯比埋今日假你。你做戲拐下拐下入嚟都好呀！？
同埋其實痛風啲人都會照返工。大吉利是你成個禮拜先至唔痛，係唔係你每次都攞一個禮拜假呢？
2. 姑娘1又做到傻咗。話說子宮頸癌針開始有貨，當然衝左一班北方佳麗過嚟爭住要打針。
幫佢地約時間，有一群朋友想約埋同一個time slot。姑娘1話同一個時間唔會可以幫咁多個人打針。佢講嘅時候係好大力打自己手臂，佢係打落人哋打針個位。
嘩！唔使咁肉緊喎！打到啪啪聲！打到自己斷啦！你洗唔洗唞一唞，暫時離開聽電話嗰個位呢？🤣🤣🤣🤣
～～～
A. 多謝冰島姑娘嘅台灣手信！ 個蛋黃哥朱古力會唔捨得食！我仲爭你麥當當飯錢～
B. 今日行程緊湊，去咗舊同事1嘅診所開張湊熱鬧。同一棟大廈有舊同事2嘅診所。我就順便買咗西餅上去探舊同事2。佢隨即封番封利是比我！返到屋企拆開佢嚇死我！我都冇買$500西餅，我有賺喔，哈哈哈😄！駛乜咁客氣，我自願買嘅！咁樣我就會成日走黎買西餅逗利是！
C. 走完幾場之後就揸車返屋企。好彩臨走喺美麗華買咗杯玫瑰錫蘭奶茶。真係好鬼好味，咁多年都仲係好鍾意飲佢！雖然$44一杯我覺得好貴！但係呢杯野陪住我塞個幾鐘頭車，我覺得好膠興！副作用係返到屋企即刻要衝去廁所因為好急尿🤣～～～
Search